सलग दुसऱ्या वर्षी मिळविला पुरस्कार
पंढरपूर प्रतिनिधी
शैक्षणिक क्षेत्रात विविध उपक्रम राबवून विद्यार्थ्यांना गुणवत्तेत परिपक्व बनवण्याचा ध्यास घेतलेली गोपाळपूर (ता.पंढरपूर) येथील ‘स्वेरी’ ही शिक्षण संस्था केवळ शैक्षणिक क्षेत्रातच अग्रेसर झाली आहे असे नव्हे तर आता क्रीडा क्षेत्रातही आपली चमकदार कामगिरी करत आहे हे मागील काही वर्षांपासून दिसून येत आहे. नुकत्याच कुर्डूवाडी येथे झालेल्या बॉक्सिंग स्पर्धेमध्ये स्वेरीच्या अविराज विजयकुमार नागटिळक यांनी सुवर्णपदक पटकावले. त्याबद्दल त्यांचे सर्वत्र अभिनंदन होत आहे.
पुण्यश्लोक अहिल्यादेवी होळकर सोलापूर विद्यापीठ, सोलापूर अंतर्गत कुर्डूवाडी येथील के. एन. भिसे कला, वाणिज्य व विनायकराव पाटील विज्ञान महाविद्यालयात आयोजलेल्या विद्यापीठ स्तरीय बॉक्सिंग स्पर्धेमध्ये स्वेरीज् कॉलेज ऑफ इंजिनिअरिंगच्या मेकॅनिकल इंजिनिअरिंग विभागातील शेवटच्या वर्षात शिक्षण घेणारे विद्यार्थी अविराज नागटिळक यांनी ६४ किलो ते ६९ किलो वजन गटात प्रथम क्रमांकाने विजयी होऊन सुवर्णपदक मिळवले. त्यांनी बॉक्सिंगच्या अंतिम सामन्यात सांगोला महाविद्यालय सांगोल्याच्या अमित लोकरे यांचा पराभव केला. या विजयामुळे जानेवारी २०२४ मध्ये अमृतसर (पंजाब) मध्ये होणाऱ्या नॅशनल स्पर्धेसाठी अविराज नागटिळक यांची निवड झाली आहे. खेळाची आवड असलेल्या नागटिळक यांना सुरवातीपासून स्वेरीचे संस्थापक सचिव व अभियांत्रिकी महाविद्यालयाचे प्राचार्य डॉ. बी. पी. रोंगे यांची सातत्त्याने प्रेरणा मिळत होती. त्यामुळे अविराज यांनी शिक्षणाबरोबरच खेळाकडेही लक्ष दिले आणि आपले लक्ष्य गाठले. त्यांना क्रीडा मार्गदर्शक प्रा.संजय मोरे यांचेही मार्गदर्शन लाभले. विद्यार्थ्यांचे आरोग्य उत्तम रहावे यासाठी स्वेरीमध्ये शिक्षणाबरोबरच नियमित योगा करून घेतला जातो. स्वेरी मध्ये अत्याधुनिक सुविधा असलेल्या स्वतंत्र जीमची सोय देखील करण्यात आली आहे याचा विद्यार्थ्यांना नियमित फायदा होतो. अविराज नागटिळक यांनी बॉक्सिंग स्पर्धेमध्ये सुवर्णपदक पटकवल्यामुळे त्यांचा स्वेरीच्या वतीने सत्कार करण्यात आला. यावेळी अविराज यांचे वडील अॅड.विजयकुमार नागटिळक, बंधू अजिंक्य नागटिळक देखील उपस्थित होते.
बॉक्सिंग स्पर्धेत सुवर्णपदक मिळविल्यामुळे स्वेरीचे संस्थापक सचिव व अभियांत्रिकी महाविद्यालयाचे प्राचार्य डॉ. बी.पी. रोंगे, संस्थेचे अध्यक्ष दादासाहेब रोंगे, उपाध्यक्ष हनीफ शेख तसेच संस्थेचे विश्वस्त व पदाधिकारी, कॅम्पस इन्चार्ज डॉ. एम.एम.पवार, स्वेरी अंतर्गत असलेल्या इतर महाविद्यालयांचे प्राचार्य, अधिष्ठाता, विभागप्रमुख, प्राध्यापक वर्ग, शिक्षकेतर कर्मचारी, विद्यार्थी व पालकांनी अभिनंदन केले.
