पुणे प्रतिनिधी माहेश्वरी तेटाबे तेज न्यूज
मराठी साहित्य, पत्रकारिता, शैक्षणिक, सामाजिक आणि सांस्कृतिक क्षेत्रात उल्लेखनीय योगदान देणारे कवी, साहित्यिक, अभ्यासक, पत्रकार व समाजसेवक डॉ. जनार्दन भोसले यांना अमेरिकेतील युनिव्हर्सिटी ऑफ लूशियाना यांच्या वतीने ‘डॉक्टर ऑफ लिटरेचर’ (D.Litt.) ही मानद पदवी प्रदान करून गौरविण्यात आले. त्यांच्या बहुआयामी कार्याची आंतरराष्ट्रीय शैक्षणिक क्षेत्राने घेतलेली दखल म्हणून या सन्मानाकडे पाहिले जात आहे.
पुणे हे देशातील महत्त्वाचे शैक्षणिक व सांस्कृतिक केंद्र म्हणून ओळखले जाते. याच पुण्यभूमीत झालेल्या या गौरवामुळे डॉ. भोसले यांच्या साहित्यिक आणि सामाजिक कार्याला विशेष प्रतिष्ठा प्राप्त झाली आहे. आयपीएस अधिकारी तसेच काश्मीरमधील शास्त्रज्ञ आणि विविध क्षेत्रांतील मान्यवरांच्या उपस्थितीत त्यांना डी.लिट. पदवीने सन्मानित करण्यात आले.
भारत-पाकिस्तान फाळणीच्या पार्श्वभूमीवर लिहिलेल्या ‘निधर्मीवाद’ या समीक्षात्मक ग्रंथाची महाराष्ट्राच्या साहित्यविश्वात विशेष दखल घेण्यात आली. या पुस्तकाला २५ राज्यस्तरीय पुरस्कार आणि दोन राष्ट्रीय पुरस्कार प्राप्त झाल्याचे सांगण्यात येते. त्यांच्या संशोधनपर लेखनाबरोबरच काव्यनिर्मितीलाही विविध स्तरांवर गौरविण्यात आले असून, त्यांच्या साहित्यिक कार्याला व्यापक मान्यता मिळाली आहे.
साहित्याबरोबरच डॉ. भोसले यांचे सामाजिक कार्यही उल्लेखनीय आहे. ‘दारू सोडवा अभियान’ राबवून व्यसनमुक्तीचा संदेश देण्याचे काम ते करीत आहेत. तंबाखूजन्य पदार्थ व गुटख्याच्या सेवनामुळे होणाऱ्या दुष्परिणामांविषयी तरुणांमध्ये जनजागृती करून त्यांना व्यसनापासून दूर राहण्याचे आवाहन ते करतात.
साहित्य, भाषा, संशोधन, पत्रकारिता, सामाजिक प्रबोधन आणि सांस्कृतिक क्षेत्रातील या बहुआयामी योगदानाचा विचार करून डॉ. जनार्दन भोसले यांना ‘मानद डॉक्टर ऑफ लिटरेचर इन मराठी’ (D.Litt.) या सन्मानाने गौरविण्यात आले.
डॉ. जनार्दन भोसले यांना मिळालेल्या या आंतरराष्ट्रीय सन्मानाबद्दल साहित्यिक डॉ. पंडितराव टापरे, कवी फ. शहाजिंदे, ज्येष्ठ साहित्यिक डॉ. श्रीपाल सबनीस, रिझर्व्ह बँकेचे संचालक आशुतोष रारावीकर, सीआयडी अधिकारी संतोष देसाई, काशीबाई नवले कॉलजचे डॉ. अरविंद भोरे, डॉ. सचिन वानखेडे, डॉ. संदीप जाधव यांच्यासह वाई तालुका पत्रकार संघातील सर्व पत्रकार, बावधन ग्रामस्थ, मित्रपरिवार, वाचक, साहित्यिक आणि विविध क्षेत्रांतील मान्यवरांनी त्यांचे अभिनंदन केले.
मराठी भाषा, साहित्य आणि सामाजिक बांधिलकीची पताका आंतरराष्ट्रीय स्तरावर पोहोचविणाऱ्या डॉ. जनार्दन भोसले यांच्या कार्याला मिळालेला हा सन्मान म्हणजे त्यांच्या वैयक्तिक कर्तृत्वाचा गौरव तर आहेच; मात्र त्याचबरोबर मराठी साहित्यविश्वासाठीही अभिमानाचा क्षण असल्याची भावना साहित्यिक व सामाजिक क्षेत्रातून व्यक्त होत आहे.
