सोलापूर प्रतिनिधी तेज न्यूज
आषाढी पंढरीच्या वारीत राज्यभरातून येणाऱ्या लाखो वारकऱ्यांच्या सुरक्षिततेसाठी सोलापूर ग्रामीण पोलीस दल पूर्णपणे सज्ज झाले आहे. वारकऱ्यांचा प्रवास निर्विघ्न, सुरक्षित आणि सुखकर व्हावा यासाठी सोलापूर ग्रामीणचे पोलीस अधीक्षक अतुल कुलकर्णी यांच्या संकल्पनेतून पालखी सोहळ्यावर लक्ष ठेवण्यासाठी अत्याधुनिक ड्रोनची तैनाती करण्यात आली आहे.
पालखी सोहळ्याने सोलापूर जिल्ह्यात प्रवेश करताच, धर्मपुरी बॉर्डर ते नातेपुते या मुख्य पालखी मार्गावर अत्याधुनिक ड्रोनच्या माध्यमातून संपूर्ण परिसरावर कडक निगराणी ठेवली जात आहे.
ड्रोन तंत्रज्ञानाचा असा होतोय फायदा
२४ तास निगराणी व सुरक्षा:
संत ज्ञानेश्वर महाराज आणि संत तुकाराम महाराज यांच्या पालखी सोहळ्यादरम्यान जनसागरावर आणि मार्गावर ड्रोनद्वारे बारकाईने लक्ष ठेवले जात आहे, ज्यामुळे वारकऱ्यांच्या सुरक्षेचा प्रश्न अधिक मजबूत झाला आहे.
वाहतूक कोंडीवर तात्काळ तोडगा:
वारीच्या काळात महामार्गांवर होणारी वाहनांची वाहतूक कोंडी वेळीच ओळखून वाहतूक योग्य दिशेने वळवण्यासाठी (डायव्हर्ट करण्यासाठी) या ड्रोनची विशेष मदत होत आहे.
सुखकर व आरामदायी प्रवास:
वाहतूक वेळीच मोकळी करून दिल्यामुळे पालखी सोहळा आणि वारकऱ्यांचा पुढील प्रवास अतिशय विनाअडथळा व सुखकर होत आहे.
सोलापूर ग्रामीण पोलिसांच्या या आधुनिक उपक्रमामुळे वारकऱ्यांमधून आणि नागरिकांमधून समाधान व्यक्त केले जात असून, सुरक्षेच्या दृष्टीने पोलीस प्रशासनाने घेतलेला हा निर्णय अत्यंत प्रभावी ठरत आहे.
.jpg)
