नाशिक प्रतिनिधी तेज न्यूज
निरोगी आरोग्य हीच यशाची गुरुकिल्ली”
“जिथे कमी तेथे आम्ही” या ब्रीदवाक्याने कार्यरत असलेल्या नमस्ते नाशिक फाउंडेशन यांच्या चौथ्या वर्धापन दिनानिमित्त सामाजिक बांधिलकी जपणारा उपक्रम उत्साहात संपन्न झाला. गोखले एज्युकेशन सोसायटी संचलित डॉ. मो. स. गोसावी भौतिकोपचार महाविद्यालय यांच्या संयुक्त विद्यमाने मोफत फिजिओथेरपी तपासणी व उपचार शिबिराचे आयोजन करण्यात आले होते.
आजच्या धावपळीच्या जीवनशैलीत अनेक आजार हे औषधोपचार किंवा शस्त्रक्रियेविना केवळ योग्य व्यायाम व तज्ज्ञ मार्गदर्शनाने नियंत्रित व बरे होऊ शकतात. फिजिओथेरपी ही सुरक्षित, सोपी आणि आधुनिक उपचारपद्धती असून ती स्नायू-हाडे, मज्जासंस्था व हृदयवहिन्यासंबंधी विकारांवर प्रभावी ठरते. योग्य तंत्रे व व्यायामांच्या साहाय्याने वेदना कमी करणे, हालचाल सुधारणा करणे आणि जीवनमान उंचावणे शक्य होते.
या शिबिरामध्ये १०० हून अधिक रुग्णांची मोफत तपासणी करण्यात आली. रुग्णांची प्रकृती, लक्षणे व वैद्यकीय इतिहास विचारात घेऊन वैयक्तिक उपचार योजना तयार करण्यात आली. पात्र फिजिओथेरपिस्टकडून तपासणी, व्यायामाचे मार्गदर्शन, वेदनामुक्तीसाठी थेरपी तसेच घरच्या घरी करण्यासाठी वैयक्तिकृत व्यायामाची उपचारपद्धती निश्चित करण्यात आली.
या उपक्रमासाठी महाविद्यालयाचे प्रिन्सिपल डॉ. बसवराज चंदू, डॉ. नुपूर आदमाने, डॉ. अर्चना बोधले, डॉ. श्रद्धा कोठावळे व डॉ. दिपाली पाटील यांनी रुग्णांची तपासणी करून प्रभावी मार्गदर्शन केले. नमस्ते नाशिक फाउंडेशनच्या अध्यक्षा स्नेहल देव यांनी सर्व मान्यवर, डॉक्टर व स्वयंसेवकांचे मनःपूर्वक आभार मानले व अशा सामाजिक आरोग्यवर्धक उपक्रमांची गरज अधोरेखित केली. व फिजिओथेरपी कॅम्प घ्यावयास असल्यास संस्थेशी संपर्क करण्याचे आवाहन केले.
यावेळी म्हाडाचे सभापती रंजन ठाकरे, नगरसेवक समीर कांबळे, सुरेश पाटील, सीमा ठाकरे, व अनिल नाहर, संगीता बाफना, संजय सोनार, राजेंद्र डुंगरवाल,दिलीप चिंचोरे, राजेंद्र सुराणा, रंजना चिंचोरे, संजय कुमार जैन आदी मान्यवर उपस्थित होते.
कार्यक्रमाच्या यशस्वी आयोजनासाठी संस्थेचे कविता तिजारे व संदीप देव यांनी विशेष परिश्रम घेतले.
समाजाच्या आरोग्यरक्षणासाठी आणि सर्वसामान्यांना मोफत आरोग्यसेवा उपलब्ध करून देण्याचा हा प्रयत्न कौतुकास्पद ठरला. भविष्यातही अशा उपक्रमांद्वारे “निरोगी नाशिक, सशक्त महाराष्ट्र” घडविण्याचा संकल्प संस्थेचे अध्यक्ष स्नेहल देव यांनी व्यक्त केला.
