कोर्टी, पंढरपूर प्रतिनिधी तेज न्यूज
विद्यार्थ्यांना गुणवत्तापूर्ण, कृतीशील आणि अनुभवाधारित शिक्षण देण्यासाठी पारंपरिक अध्यापन पद्धतींसोबत आधुनिक व विद्यार्थी-केंद्रित अध्यापन तंत्रांचा प्रभावी वापर करणे ही काळाची गरज आहे, असे प्रतिपादन एसकेएन सिंहगड अभियांत्रिकी महाविद्यालयाचे प्राचार्य व कॅम्पस डायरेक्टर डॉ. कैलाश करांडे यांनी केले.
एसकेएन सिंहगड अभियांत्रिकी महाविद्यालय, कोर्टी, पंढरपूर येथे प्राध्यापकांच्या अध्यापन कौशल्यांचा विकास करणे, आधुनिक शैक्षणिक पद्धतींची ओळख करून देणे तसेच अभियांत्रिकी शिक्षण अधिक प्रभावी आणि विद्यार्थी-केंद्रित करण्याच्या उद्देशाने दि. २६ ते ३१ ऑक्टोबर २०२६ या कालावधीत 'Active-Based Learning (सक्रिय अध्ययन पद्धती)' या विषयावर सहा दिवसीय फॅकल्टी डेव्हलपमेंट प्रोग्राम (FDP) उत्साहात संपन्न झाला. या प्रशिक्षण कार्यक्रमात महाविद्यालयातील विविध विभागांतील ५० हून अधिक प्राध्यापकांनी उत्स्फूर्त सहभाग नोंदविला.
विशेष म्हणजे, हा प्रशिक्षण कार्यक्रम महाविद्यालयातील AICTE IDEA Lab येथे प्रत्यक्ष प्रात्यक्षिकांच्या माध्यमातून राबविण्यात आला. प्रशिक्षणादरम्यान आयडिया लॅबमधील विविध आधुनिक उपकरणे, तंत्रज्ञान आणि सॉफ्टवेअरचा प्रभावी वापर करून सहभागी प्राध्यापकांनी ५० हून अधिक नाविन्यपूर्ण उत्पादने (Products) विकसित केली. या प्रात्यक्षिकांमुळे प्राध्यापकांना केवळ सैद्धांतिक ज्ञान न मिळता प्रत्यक्ष कृतीतून शिकण्याचा आणि आपल्या कल्पनांना मूर्त स्वरूप देण्याचा अनुभव मिळाला.
या प्रशिक्षण कार्यक्रमामध्ये सक्रिय अध्ययन पद्धतीचे महत्त्व, नाविन्यपूर्ण अध्यापन तंत्रे, विद्यार्थ्यांचा वर्गातील सक्रिय सहभाग, समूहचर्चा, सहकार्यात्मक अध्ययन, अनुभवाधारित शिक्षण, समस्या-आधारित शिक्षण आणि प्रकल्प-आधारित शिक्षण अशा विविध विषयांवर मार्गदर्शन करण्यात आले. पारंपरिक अध्यापन पद्धतींऐवजी विद्यार्थ्यांना अध्ययन प्रक्रियेत सक्रिय सहभागी करून घेणे, त्यांच्यामध्ये चिकित्सक विचारसरणी विकसित करणे, समस्या सोडविण्याची क्षमता वाढविणे तसेच सैद्धांतिक ज्ञानाचा व्यावहारिक जीवनात उपयोग करण्यास सक्षम बनविणे यावर विशेष भर देण्यात आला.
या प्रशिक्षणाच्या माध्यमातून सहभागी प्राध्यापकांना आधुनिक अध्यापन तंत्रांचा प्रभावी वापर, विद्यार्थ्यांच्या अध्ययन क्षमतेनुसार अध्यापनाचे नियोजन, प्रत्यक्ष कृतीतून ज्ञानार्जन आणि अधिक परिणामकारक शैक्षणिक वातावरण निर्माण करण्यासंदर्भात महत्त्वपूर्ण अनुभव मिळाला. तसेच विविध विभागांतील प्राध्यापकांना आपले अध्यापन अनुभव, तांत्रिक कौशल्ये आणि नावीन्यपूर्ण कल्पनांची देवाणघेवाण करण्यासाठी एक उत्तम व्यासपीठ उपलब्ध झाले.
महाविद्यालयाचे प्राचार्य व कॅम्पस डायरेक्टर डॉ. कैलाश करांडे यांच्या मार्गदर्शनाखाली हा उपक्रम यशस्वीरीत्या पार पडला. कार्यक्रमासाठी महाविद्यालयाचे उपप्राचार्य डॉ. स्वानंद कुलकर्णी, डॉ. चेतन पिसे, सर्व विभागप्रमुख, प्राध्यापक आणि संबंधित समन्वयक यांनी मोलाचे सहकार्य केले.
सहा दिवसांच्या या प्रशिक्षण कार्यक्रमामुळे ५० हून अधिक प्राध्यापकांच्या अध्यापन कौशल्यांना नवी दिशा मिळाली असून, AICTE IDEA Lab मधील आधुनिक उपकरणे व सॉफ्टवेअरच्या साहाय्याने तयार करण्यात आलेली ५० हून अधिक उत्पादने हे या FDP चे विशेष आकर्षण ठरले. या उपक्रमामुळे संस्थेमध्ये नाविन्यपूर्ण, तंत्रज्ञानाधारित आणि विद्यार्थी-केंद्रित अध्यापन संस्कृतीला चालना मिळणार असून, विद्यार्थ्यांच्या सर्वांगीण विकासासाठी हा उपक्रम निश्चितच महत्त्वपूर्ण ठरणार आहे.
