पंढरपूर प्रतिनिधी तेज न्यूज
रयत शिक्षण संस्थेच्या कर्मवीर भाऊराव पाटील महाविद्यालयात राष्ट्रीय क्रीडा दिनानिमित्त “CrossFit Challenge–2026” ही आगळीवेगळी व उत्साहपूर्ण क्रीडा स्पर्धा आयोजित करण्यात आली. महाविद्यालयातील सर्व हाऊसच्या मुलांच्या व मुलींच्या संघांनी या स्पर्धेत उत्स्फूर्त सहभाग नोंदविला.
सदर स्पर्धा मा. प्राचार्य प्रा. बी. टी. जाधव यांच्या मार्गदर्शनाखाली आयोजित करण्यात आली. स्पर्धेचे उद्घाटन प्रमुख पाहुणे मा. आनंद धवन, शारीरिक शिक्षण संचालक, उमा महाविद्यालय आणि मा. अवधूत बडवे, माजी विद्यार्थी, क्रीडा मार्गदर्शक व रयत शिक्षण संस्थेचे जनरल बॉडी सदस्य मा.अमरजीत पाटील यांच्या प्रमुख उपस्थितीत करण्यात आले. कार्यक्रमाच्या अध्यक्षस्थानी उपप्राचार्य डॉ. समाधान माने हे होते. यावेळी उपप्राचार्य डॉ. बी. एस. बलवंत, डॉ. राजेश कवडे व डॉ. सुशील शिंदे यांची उपस्थिती लाभली.
क्रॉसफिट स्पर्धेमध्ये खेळाडूंना विविध शारीरिक क्षमता, वेग, ताकद, सहनशक्ती व सांघिक समन्वयाची कसोटी पाहणाऱ्या विविध स्टेशनवर आधारित आव्हाने पूर्ण करावी लागली. प्रत्येक संघातील खेळाडूंनी ठरावीक क्रमाने स्टेशन पूर्ण करून आपल्या संघासाठी सर्वोत्तम वेळ नोंदविण्याचा प्रयत्न केला. या स्पर्धेमुळे विद्यार्थ्यांमध्ये शारीरिक तंदुरुस्ती, आत्मविश्वास, शिस्त, सांघिक भावना आणि क्रीडावृत्ती विकसित होण्यास मदत झाली.
मुलांच्या गटात प्रतापगड हाऊसने प्रथम, तोरणा हाऊसने द्वितीय व रायगड हाऊसने तृतीय क्रमांक मिळविला. मुलींच्या गटात सिंहगड हाऊसने प्रथम, रायगड हाऊसने द्वितीय व तोरणा हाऊसने तृतीय क्रमांक पटकाविला. मुलांमध्ये विकास चौगुले व मुलींमध्ये प्रतिक्षा चवरे यांनी उत्कृष्ट कामगिरी करून Best Runner हा बहुमान मिळविला. विजेत्या खेळाडूंना मान्यवरांच्या हस्ते पारितोषिके व प्रमाणपत्रांचे वितरण करण्यात आले.
सदर स्पर्धेच्या यशस्वी आयोजनासाठी क्रीडा विभागाचे वरिष्ठ विभाग प्रमुख प्रा. अनिल परमार, कनिष्ठ विभाग प्रमुख प्रा. विठ्ठल फुले व प्रा. मनोज खपाले यांनी विशेष परिश्रम घेतले. तसेच जिमखाना समिती, स्वयंसेवक, शारीरिक शिक्षण विभाग, मास कम्युनिकेशन विभाग सर्व प्राध्यापक व सेवक वर्ग यांचे मोलाचे सहकार्य लाभले.
राष्ट्रीय क्रीडा दिनानिमित्त आयोजित करण्यात आलेली ही क्रॉसफिट चॅलेंज स्पर्धा विद्यार्थ्यांसाठी शारीरिक तंदुरुस्ती आणि क्रीडावृत्तीचा संदेश देणारा प्रेरणादायी उपक्रम ठरली.
