पंढरपूर प्रतिनिधी तेज न्यूज
सावित्रीबाई फुले शिक्षण प्रसारक मंडळाच्या एस.के.एन. सिंहगड कॉलेज ऑफ इंजिनिअरिंग, कोर्टी,पंढरपूर येथील यांत्रिकी अभियांत्रिकी विभागामार्फत तृतीय वर्ष यांत्रिकी अभियांत्रिकीच्या विद्यार्थ्यांसाठी दिनांक १४ ऑगस्ट २०२६ रोजी ‘प्रगत उत्पादन तंत्रज्ञान’ या विषयावर तज्ज्ञ व्याख्यान यशस्वीरीत्या आयोजित करण्यात आले.
या व्याख्यानासाठी एस.ए.जे. कन्सल्टन्सी, सोलापूर येथील मुख्य कार्यकारी अधिकारी प्रा. एस. ए. जेऊरकर हे तज्ज्ञ मार्गदर्शक म्हणून उपस्थित होते. त्यांनी विद्यार्थ्यांना आधुनिक उत्पादन क्षेत्रातील बदलते तंत्रज्ञान, प्रगत उत्पादन प्रक्रियांची आवश्यकता आणि त्यांचे औद्योगिक उपयोग याबाबत सविस्तर मार्गदर्शन केले.
व्याख्यानामध्ये अडिटीव्ह मॅन्युफॅक्चरिंग, प्रगत मशीनिंग प्रक्रिया, आधुनिक संगणकाधारित उत्पादन तंत्रज्ञान, उद्योग ४.० आधारित उत्पादन प्रणाली तसेच आधुनिक उत्पादन क्षेत्रातील तंत्रज्ञानाचा वापर यांसारख्या विषयांवर मार्गदर्शन करण्यात आले. प्रगत उत्पादन तंत्रज्ञानामुळे जटिल आकारांचे घटक, अचूक उत्पादन, कमी उत्पादन वेळ आणि कार्यक्षम संसाधन वापर यांना चालना मिळते.
तज्ज्ञांनी औद्योगिक क्षेत्रातील प्रत्यक्ष उदाहरणांच्या माध्यमातून विद्यार्थ्यांना आधुनिक उत्पादन प्रक्रियांचे महत्त्व समजावून सांगितले. या व्याख्यानामुळे विद्यार्थ्यांना अभ्यासक्रमातील सैद्धांतिक ज्ञान आणि प्रत्यक्ष औद्योगिक तंत्रज्ञान यांचा संबंध समजून घेण्यास मदत झाली. प्रगत उत्पादन तंत्रज्ञानातील विविध प्रक्रिया, त्यांची निवड, उपयोगिता आणि भविष्यातील रोजगाराच्या संधी याविषयीही विद्यार्थ्यांना उपयुक्त माहिती मिळाली.
या कार्यक्रमाचे आयोजन यांत्रिकी अभियांत्रिकी विभागप्रमुख डॉ. श्याम कुलकर्णी, उपप्राचार्य डॉ. स्वानंद कुलकर्णी तसेच प्राचार्य डॉ. कैलाश जगन्नाथ करांडे यांच्या मार्गदर्शनाखाली करण्यात आले.
या तज्ज्ञ व्याख्यानामुळे विद्यार्थ्यांच्या तांत्रिक ज्ञानात, औद्योगिक दृष्टिकोनात आणि आधुनिक उत्पादन तंत्रज्ञानाविषयीच्या समजुतीत निश्चितच भर पडली. कार्यक्रम विद्यार्थ्यांसाठी ज्ञानवर्धक व उपयुक्त ठरला.
