मुंबई प्रतिनिधी तेज न्यूज
पंतप्रधान नरेंद्र मोदी यांच्या एपस्टीन फाईलमधील उल्लेखावरून वंचित बहुजन आघाडीचे नेते ॲड. प्रकाश आंबेडकर यांनी आक्रमक पवित्रा घेतला आहे. या प्रकरणाच्या निषेधार्थ २ मार्च २०२६ रोजी मुंबईतील छत्रपती शिवाजी महाराज टर्मिनस , मुंबई समोर भव्य निदर्शने करण्यात येणार असल्याची घोषणा त्यांनी 'एक्स' (ट्विटर) वरून केली आहे.
शुक्रवारी (दि. २०) मुंबईत विविध सामाजिक संघटनांची एक महत्त्वाची बैठक पार पडली. या बैठकीत प्रामुख्याने तीन मुद्द्यांवर चर्चा करण्यात आली. ज्यामध्ये एपस्टीन या फाईलमध्ये पंतप्रधान मोदींच्या नावाने एक ईमेल असल्याचा आरोप ॲड. प्रकाश आंबेडकरांनी केला आहे. तसेच अमेरिका-भारत व्यापारी करारामुळे भारत अमेरिकेचा गुलाम होत असल्याचा आरोप त्यांनी केला. मोदींच्या जुन्या वादांवर पुन्हा एकदा चर्चा करण्यात आली.
'एपस्टीन फाईल' आणि गंभीर आरोप
प्रकाश आंबेडकर यांनी आपल्या पोस्टमध्ये अत्यंत महत्त्वपूर्ण माहिती दिली आहे. ते म्हणाले की, एपस्टीन फाईलमध्ये जेफ्री एपस्टीनने मोदींना अमेरिकेचे तत्कालीन राष्ट्राध्यक्ष डोनाल्ड ट्रम्प यांना खुश करण्यासाठी इस्रायल दौऱ्यात 'नाच-गाणे' करण्याचा सल्ला दिला होता. त्या दौऱ्यात पंतप्रधान मोदी यांनी नाचगाणे केल्याचा उल्लेख इमेल मध्ये आलाय. यावरून त्यांनी पंतप्रधानांवर टीका करत, केंद्र सरकारने देशाला गहाण ठेवल्याचा आरोप केला आहे.
ॲड. प्रकाश आंबेडकर म्हणाले की, अमेरिकेसोबत झालेला करार केवळ कृषी क्षेत्रापुरता मर्यादित नसून, भारताची विदेश नीती, अर्थ नीती आणि आरोग्य नीती आता अमेरिका ठरवणार आहे. पंतप्रधानांनी देशाला अमेरिकेच्या दावणीला बांधले आहे, त्यामुळे त्यांनी तातडीने राजीनामा द्यावा, अशी मागणी त्यांनी केली आहे. तसेच देशाचे सार्वभौमत्व धोक्यात आले आहे.
हा देश विकण्यापासून वाचवण्यासाठी २ मार्च रोजी होणाऱ्या निदर्शनांत तमाम जनतेने मोठ्या संख्येने सहभागी व्हावे, असे आवाहन ॲड. प्रकाश आंबेडकर यांनी केले आहे. दरम्यान, एपस्टीन फाइलमध्ये नरेंद्र मोदीचे नाव आल्याने देशभरात संतापाची लाट उसळली आहे.
