पंढरपूर प्रतिनिधी तेज न्यूज
अखिल भारतीय ग्राहक पंचायत, सोलापूर जिल्ह्यातर्फे २४ डिसेंबर या राष्ट्रीय ग्राहक दिना निमित्त संपूर्ण जिल्ह्यात ग्राहक प्रबोधन,जागरण पंधरवड्याचे आयोजन करण्यात आल्याची माहिती अखिल भारतीय ग्राहक पंचायतीचे जिल्हाध्यक्ष शशिकांत हरिदास यांनी दिली.
अखिल भारतीय ग्राहक पंचायतीने ५२ व्या वर्षात पदार्पण केले आहे त्यामुळे यावर्षी मोठ्या प्रमाणात हा प्रबोधन पंधरवडा साजरा करण्यात येणार आहे.
देशभरामध्ये २४ डिसेंबर हा दिवस "राष्ट्रीय ग्राहक दिन" म्हणून शासकीय,अशासकीय पातळीवर साजरा करण्यात येतो. त्यानिमित्ताने दिनांक १५ डिसेंबर ते ३१ डिसेंबर पर्यंत सोलापूर जिल्ह्यातील सर्व तालुक्यांमध्ये विविध कार्यक्रम,उपक्रम,स्पर्धांचे आयोजन करण्यात आले आहे.
तहसील कार्यालये, पुरवठा विभाग,पंचायत समिती, शिक्षण, आरोग्य,महिला व बाल कल्याण,सार्वजनिक बांधकाम, महावितरण,ग्रामीण व उपजिल्हा रुग्णालये,वजन मापे (वैधमापन),अन्न व औषध प्रशासन(भेसळ प्रतिबंधक), नगरपालिका,महानगरपालिका,टपाल कार्यालये, बस स्थानके,रेल्वे स्टेशन, राष्ट्रीयकृत बॅंका, सहकारी बँका,पतसंस्था,पोलिस विभाग,कोषागार कार्यालय, आर.टी.ओ कार्यालये,तसेच व्यापारी कमेटी, कृषी उत्पन्न बाजार समिती,अशा विविध शासकीय, अशासकीय कार्यालयात,सार्वजनिक ठिकाणी सुधारित ग्राहक संरक्षण कायदा २०१९ बाबत व ग्राहक चळवळीची माहिती दिली जाणार आहे.
यासाठी प्रांत सहसचिव दीपक इरकल,सदस्य विनोद भरते,सुभाष सरदेशमुख, जिल्हाध्यक्ष शशिकांत हरिदास, प्रांत सहसचिव दीपक इरकल,सचिव सुहास निकते,कोषाध्यक्ष ललिता वांगडे,जिल्हा उपाध्यक्ष विनय उपाध्ये,जिल्हा सहसचिव दीपक भंडारकवठेकर,जिल्हा महिला विभाग प्रमुख सौ.माधुरी परदेशी,जिल्हा प्रबोधन प्रमुख प्रा. भीष्माचार्य चांदणे,जिल्हा सदस्य उपेंद्र केसकर, संतोष उपाध्ये,पांडुरंग अल्लापूरकर तसेच संबंधित खात्याचे अधिकारी, जिल्हा ग्राहक संरक्षण परिषदेचे सदस्य, प्रत्येक तालुका अध्यक्ष,सचिव हे उपस्थित राहून प्रबोधन, मार्गदर्शन करणार आहेत.
या सर्व कार्यक्रमास ग्राहकांनी आवर्जून उपस्थित राहुन ग्राहक संरक्षण कायद्याविषयी माहिती जाणून घ्यावी व आपल्या समस्या,अडचणी सोडविण्यासाठी जागृत व्हावे असे आवाहन अखिल भारतीय ग्राहक पंचायतीच्यावतीने करण्यात आले आहे.
