पंढरपूर
१९९८ साली स्थापन झालेल्या स्वेरीज कॉलेज ऑफ इंजिनिअरिंगने शैक्षणिक कार्यासोबतच संशोधन कार्यात देखील पंढरपूरची ओळख राज्यभर पसरवली आहे. नुकतेच महात्मा गांधी मिशन अर्थात एम.जी.एम.,नवी मुंबई येथे संशोधनासंबंधी झालेल्या एकदिवसीय कार्यशाळेत विविध संशोधकांसमोर भारताचे थोर अणुशास्त्रज्ञ, पद्मविभूषण डॉ.अनिल काकोडकर यांनी स्वेरीच्या प्रॉडक्टचे विशेष कौतुक केले.
नवी मुंबई मध्ये एम.जी.एम. या महाविद्यालयात दि.८ फेब्रुवारी, २०२३ रोजी एकदिवसीय कार्यशाळेचे आयोजन केले होते. स्वेरीतर्फे स्वेरीचे संस्थापक सचिव व अभियांत्रिकी महाविद्यालयाचे प्राचार्य डॉ.बी.पी.रोंगे यांच्या नियोजनात्मक मार्गदर्शनाखाली स्वेरीज् कॉलेज ऑफ इंजिनिअरिंगच्या मेकॅनिकल इंजिनिअरिंग विभागाचे तरुण प्राध्यापक डॉ.हर्षवर्धन रोंगे यांनी स्वेरी विकसित करत असलेले ‘हेल्थ केअर’ संबंधित प्रॉडक्ट सादर केले. या कार्यशाळेला भारताचे थोर शास्त्रज्ञ पद्मविभूषण डॉ.अनिल काकोडकर यांनी भेट देऊन पाहणी केली आणि स्वेरीच्या प्रॉडक्ट बाबत संपूर्ण माहिती जाणून घेतली.
स्वेरीच्या डॉ. हर्षवर्धन रोंगे यांनी या संशोधनासंबंधीची माहिती दिली. वास्तविक पाहता पद्मविभूषण डॉ.अनिल काकोडकर यांनी दि.०५ सप्टेंबर २०१२ रोजी ‘शिक्षक दिनी’ स्वेरी कॅम्पसमध्ये संशोधनाची सुरवात केली होती. तेंव्हापासून आजतागायत संशोधनाचे विविध प्रकल्प स्वेरीमध्ये सुरु असून यासाठी केंद्र सरकारकडून जवळपास रु. १० कोटीहून अधिक निधी स्वेरीला मिळालेला आहे. दि.२५ जानेवारी २०२१ रोजी संस्थेत स्वेरीज 'सोबस सेंटर ऑफ एक्सलन्स'ची स्थापना करण्यात आली. या सेंटरच्या माध्यमातून ग्रामीण उद्योजकता विकासाचे विविध उपक्रम हाती घेण्यात आलेले आहेत. ग्रामीण भागातील नवउद्योजकांना प्रशिक्षण देणे, त्यांच्या समस्यांचे निराकरण करण्यासाठी मदत करणे इ.कार्ये या सेंटरच्या माध्यमातून अविरतपणे सुरू आहेत. दि. २६ जून २०२१ रोजी 'न्यूक्लिअर पॉवर कॉर्पोरेशन ऑफ इंडिया लिमिटेड तारापुर, महाराष्ट्र साईट' सोबत ग्रामीण विकासाच्या दृष्टीने अतिशय महत्वाचा असा सामंजस्य करार करण्यात आला. आजपर्यंत जवळपास २९ संशोधन प्रकल्पांसाठी सुमारे दहा कोटी रुपयांचा संशोधननिधी राजीव गांधी सायन्स अँड टेक्नॉलॉजी कमिशन, ए. आर.डी. बी., मॉडरॉब, भाभा अणुसंशोधन केंद्र, डी. एस.टी., युजीसी, बी.आर.एन.एस.,डी. बी.टी. आदी संस्थांकडून प्राप्त झाला असून या निधी मधूनच कांही संशोधन प्रकल्प पूर्ण झाले आहेत तर कांही प्रकल्प पूर्णत्वाच्या मार्गावर आहेत.
या निधीच्या माध्यमातून 'स्वेरी' मध्ये विविध अद्ययावत प्रयोगशाळांची निर्मिती करण्यात आली आहे. त्यामध्ये ऍडव्हान्स्ड मॅन्युफॅक्चरिंग लॅब, चेन टेस्टिंग लॅब, व्हायब्रेशन अनालिसिस लॅब, एन.डी. टी. लॅब, लोडींग फ्रेम फॅसिलिटी, ऍडव्हान्स्ड डिझाइन अँड सिम्युलेशन लॅब, अँटेना डिझाइन लॅब इ. चा समावेश आहे. राष्ट्रीय व आंतरराष्ट्रीय पातळीवरील विविध संस्थांसोबत सुमारे ४७ सामंजस्य करार करण्यात आले असून त्याद्वारे विद्यार्थ्यांच्या आणि शिक्षकांच्या बौद्धिक विकासास आणि तांत्रिक कौशल्य वाढीस चालना मिळत आहे.
स्वेरीमध्ये विद्यार्थ्यांसाठी आणि शिक्षकांसाठी असणाऱ्या संशोधनपूरक वातावरणामुळे आणि प्रोत्साहनपर धोरणामुळे आत्तापर्यंत ५३६ पेक्षा जास्त संशोधनपर लेख प्रसिद्ध झाले आहेत. स्वेरीतील टेक्नो-सोसायटल च्या शोधनिबंधांना आंतरराष्ट्रीय 'स्कोपस' चा दर्जाही प्राप्त झाला आहे. आजपर्यंत सुमारे चाळीस पुस्तके प्रकाशित झाली असून १४ पेटंट्स देखील दाखल करण्यात आले आहेत.
स्वेरीतील संशोधनाला चालना देण्यासाठी विविध ठिकाणी होणाऱ्या संशोधन कार्यशाळेत येथील प्राध्यापक, संशोधक सहभागी होत असतात आणि अद्ययावत तंत्रज्ञान आत्मसात करत असतात. संशोधन क्षेत्रात स्वेरीने लावलेल्या रोपट्याला आता हळू हळू फळे येत आहेत, हे मात्र नक्की !
