पंढरपूर प्रतिनिधी तेज न्यूज
पंढरपूर-मंगळवेढा मतदारसंघासह राज्यातील दुष्काळग्रस्त शेतकऱ्यांना शासनाच्या नवीन निर्णयानुसार मदत व सवलतींचा लाभ मिळताना येणाऱ्या अडचणी तातडीने दूर करावेत अशी मागणी आमदार समाधान आवताडे यांनी मुख्यमंत्री देवेंद्र फडणवीस यांच्याकडे पत्राद्वारे केली आहे.
या मागणीची दखल घेत मुख्यमंत्री देवेंद्र फडणवीस यांनी संबंधित विभागाला तात्काळ कार्यवाही करण्याच्या सूचना दिल्या आहेत.
दुष्काळग्रस्त भागातील शेतकऱ्यांचे पंचनामे सरसकट करावेत. पाण्याअभावी पेरणी न केलेल्या शेतकऱ्यांना केवळ पीक नसल्याने मदतीपासून वंचित ठेवू नये. ई-पिक पाहणीची सक्ती करू नये, तसेच ऊस व फळबागांच्या नुकसानीचेही पंचनामे करावेत, अशी मागणी त्यांनी केली.
वाड्या-वस्त्यांवरील लोडशेडिंगचा प्रश्न सोडवून शेतीसाठी सलग आठ तास वीज द्यावी. प्रत्येक तालुक्यात स्वतंत्र दुष्काळ निवारण केंद्र सुरू करावे. दुष्काळ अनुदान दिवाळीपूर्वी वाटप करून रोजगार हमीची कामे सुरू करावीत. टँकर पुरवठा वेळेत करून वाड्या-वस्त्यांसाठी लहान-मोठे टँकर उपलब्ध करावेत, जनावरांना चाऱ्यासाठी चारा डेपो किंवा चारा छावण्या लवकरात लवकर सुरू करण्याची मागणी केली असल्याचे त्यांनी म्हटले आहे.
मंगळवेढा तालुक्याच्या दक्षिण भागाला म्हैसाळ योजनेतून पुरेसे पाणी द्यावे. पंढरपूर तालुक्यातील शेतकऱ्यांना नीरा-भाटघरचे पाणी उपलब्ध करून देण्यासह उजनीतून पंढरपूर व मंगळवेढ्यासाठी एक रोटेशन सोडावे, अशी मागणीही आमदार समाधान आवताडे यांनी मुख्यमंत्री देवेंद्र फडणवीस यांच्याकडे केली आहे.
सदर मागणीची दखल घेत मुख्यमंत्री देवेंद्र फडणवीस यांनी संबंधित विभागाला तात्काळ कारवाई करण्याच्या सूचना दिल्या असल्याची माहिती आमदार समाधान आवताडे यांनी दिली.
