दक्षिण सोलापूर प्रतिनिधी तेज न्यूज
दक्षिण सोलापूर तालुक्यातील वळसंग केंद्रांतर्गत सर्व शाळांना गुरुवारी सकाळी साडेदहा वाजता एकाच वेळी आकस्मिक भेटी देण्यात आल्या. गटशिक्षणाधिकारी जयश्री सुतार यांच्या मार्गदर्शनाखाली शिक्षण विस्तार अधिकारी, केंद्रप्रमुख, विशेष शिक्षक तसेच गटसाधन केंद्रातील कर्मचाऱ्यांच्या सहकार्याने हा उपक्रम राबविण्यात आला.
या आकस्मिक भेटीदरम्यान अधिकाऱ्यांनी शाळांमधील शैक्षणिक गुणवत्ता, भौतिक सुविधा, शालेय व्यवस्थापन, पीएम पोषण आहाराची अंमलबजावणी, विद्यार्थ्यांची उपस्थिती तसेच विविध शैक्षणिक उपक्रमांची प्रत्यक्ष पाहणी करून आढावा घेतला. शाळांमध्ये उपलब्ध सुविधा आणि विद्यार्थ्यांना मिळणाऱ्या शैक्षणिक वातावरणाचीही माहिती घेण्यात आली.
यानंतर केंद्र शाळा वळसंग येथे सर्व मुख्याध्यापक व तपासणी अधिकाऱ्यांची संयुक्त बैठक घेण्यात आली. यावेळी शाळानिहाय आढावा घेऊन भेटीदरम्यान निदर्शनास आलेल्या त्रुटी व उणिवांवर चर्चा करण्यात आली. संबंधित मुख्याध्यापकांना आवश्यक मार्गदर्शन करून त्रुटींची तातडीने पूर्तता करण्याच्या सूचना देण्यात आल्या.
दरम्यान, शैक्षणिक गुणवत्तावाढीसाठी विशेष व नाविन्यपूर्ण उपक्रम राबविणाऱ्या शाळांचे कौतुक करण्यात आले. विद्यार्थ्यांच्या सर्वांगीण विकासासाठी तसेच शाळांचा शैक्षणिक दर्जा उंचावण्यासाठी मुख्याध्यापक व शिक्षकांनी सातत्यपूर्ण प्रयत्न करावेत, असे आवाहन करण्यात आले.
शाळांच्या प्रत्यक्ष कामकाजाचा आढावा घेऊन आवश्यक त्या सुधारणा करण्याच्या दृष्टीने या आकस्मिक भेटी उपयुक्त ठरल्या. दक्षिण सोलापूर तालुक्यातील इतर केंद्रांमध्येही यापुढे अशाच प्रकारे आकस्मिक शाळा भेटींचे नियोजन करण्यात येणार असल्याचे गटशिक्षणाधिकारी जयश्री सुतार यांनी सांगितले.
